का तशीच चालली बनून रात्र पाहुणी?
सांगतोय का तिला मिठीतली नशा कुणी?
का तसेच चांदणे पहाटगीत गातसे?
की कुणी सुधा पिऊन धुंद धुंद होतसे?
रातराणिची तशीच ही सुगंध-स्पंदने
की कुणा मिळून मुक्ति घट्ट होत बंधने?
चोरपावली निघून जाय रात्र ही पहा,
सांगतात तृप्त श्वास, काय वाटले, अहा !
रात्र थांबवा अशीच,रात्र थांबवा जरा
सोबती तिच्याच ये,मिठीस अर्थ तो खरा!
ही जशी असेल रात्र दाट दाट आतुनी
तेवतात रासरंगदीप अंतरातुनी!
थांबवा म्हणून रात्र,चांदणेहि थांबू द्या,
रेशमी सुगंध-वेळ ही अशीच लांबू द्या!!
