माझ्या मनाच्या गाभारी / थोरा मोठ्यांची वसती /
इथे पैसा आहे फोल / मित्रता मात्र अनमोल /
माझ्या मनाच्या गाभारी / चित्तवृत्ती बहरल्या /
कधी रुसती फुगती / सदा हासती खेळती /
माझ्या मनाच्या गाभारी / विचारांची अती दाटी /
काही अर्धे आणि कच्चे / काही पक्के मुरलेले /
माझ्या मनाच्या गाभारी /सारी करुणा दाटली /
दयेमध्ये चिंब होई / स्नेहभावे विरघळे /
माझ्या मनाच्या गाभारी / प्रत्यक्ष निर्धार कोंडला /
जेव्हा कोणी भीती दावी / उफाळानी वर येई /
माझ्या मनाच्या गाभारी / कल झुके श्रमाकडे /
निद्रा, आळस, आराम / यांना आता जागा कोठे /
माझ्या मनाच्या गाभारी / कवितेचा मोठा तोरा /
निराशेच्या वातावरणा / तुला मुळी नाही थारा /