तुझे काय? माझे काय? हिशेबाला सुरुवात.
एकमत झाले : हसू, दुमताला रुजवात ।
दिले कुणी? जास्त कुणा लाभलंय दानी ऊन?
उत्तरातसुद्धा सखे,लाभतात प्रश्नचिन्हं ।
मिळे कुणा? कुणातले संपलेत चंद्र आज?
आणि माथी कुणाच्या गं आज नक्षत्रांचे साज?
कुणा नदी? पाऊसही, आणि नवी फुले, पक्षी?
हस्तरेषांतून आणि कुणाच्या गं मोर-नक्षी?
सांगतेस ? तुला तरी मोजमाप साधले का?
कमी-जास्त, प्रयत्नांनी कुणीतरी सांधले का?
"होय, सांधलेत सारे चंद्र आणि प्रश्नचिन्हं ।
फुले, पक्षी, मोर-नक्षी, पाऊस नि वेडी उन्हं ।"
मग आता तुझे आणि माझे काय हिशेबाला?
फक्त आहे मोजायाचे, खारे पाणी, तारामाला ॥