कोण म्हणतो मद्यपी शुद्धीत नाही ?
लोकहो, ही बोलण्याची रीत नाही
हाच केवळ भेद आहे आपल्यातिल
पाप करतो मी उघड, रात्रीत नाही
राहिलो मी नेहमी मागे जगाच्या
छोड दो*, मीही तसा घाईत नाही
तोल गेला हे कुठे नाकारले मी
(तोल जाण्याची मजा शिस्तीत नाही)
पत्र देवाने मला लिहिले कितीदा
स्पॅम समजून मीच पण वाचीत नाही
पाहुण्याच्या देव असण्याचा पुरावा ?
सोमप्याल्यावीण काही पीत नाही !
सांग, कोहम्, सांग भारतमाय हल्ली
बोस, गांधी अन् भगत का वीत नाही
* - ज्यांना दोन परभाषिक शब्द वाचूनही अंगावर झुरळ पडल्यासारखे वाटत असेल त्यांनी ही ओळ
'जाउ द्या, मीही तसा घाईत नाही'
अशी वाचावी व झुरळ झटकून टाकावे ही विनंती.