न संपणारी विस्कटलेली गोष्ट
लाल पायवाट
हिरवळीवर घट्ट धरून
बसलेलं जंगल
पावसाचे हेलकावे
ओढ्यांची घाई
पाखरांची लगलग
घरटी बांधण्याची
जगण्यासाठी एवढं पुरे
असं म्हंटलं तर
बुभुक्षित राहावं लागेल
म्हणून " जगणं "
विचारात घ्यावं लागेल
केवढी ही सक्ती ......?
निसर्गापासून दूर राहण्याची
पर्यावरणाचा तोल वगैरे
सगळं कसं झूट आहे
निसर्गाचे उतारे स्वतःचे आहेत
पण माणसाला उत्तराची घाई आहे
म्हणून तर तो
स्वतःला " पर्यावरणवादी " म्हणवतो
कळणार कसं तुकड्यांमधून
पाहणार कसं त्यातून
पूर्ण प्रतिबिंब ......?
पूर्णतेचे स्वप्न ,
स्वप्नच राहते, स्वप्नच राहते.