तुझ्या डोळ्यात माझे जग असावे वाटले होते;

कधीकाळी तुझ्यासाठी जगावे वाटले होते.

जरी भात्यात होती राख ओली साचली माझ्या;

निखार्‍याला पुन्हा या का फुलावे वाटले होते.

तुझ्या माझ्या क्षणांच्या आठवांनी मोडले जेव्हा;

मला तू अन् तुला मी पांघरावे वाटले होते.

कशाला भावनांचे खेळ सारे मांडले वेडे;

जरा स्पर्श तुला माझे कळावे वाटले होते.

कुणाला दोष द्यावा आज येथे ना कळे आता;

तुझ्या माझ्यातले अंतर मिटावे वाटले होते.