मनोगतकार आणि मनोगताचे प्रशासन यांची दिवाळी अंक काढायचा की नाही याकरता कमीतकमी अनुमती तरी आवश्यक आहे असे वाटते.  कारण संकेतस्थळ त्यांचे आहे.   सदस्यांनी आपला वेळ देऊन अंकासाठी सर्व प्रयत्न करायचे आणि प्रशासनाला वेळेअभावी त्याची जोडणी  सुद्धा करत आली नाही तर दिवाळी अंक एकत्रित स्वरूपात अथवा पीडिएफ मध्ये संकेतस्थळावर वाचता येणार नाही याची जाणीव सर्व सदस्यांनी असू द्यावी. मनोगताचा दिवाळी अंक एखाद्या ब्लॉगवर वाचण्यात काय अर्थ आहे?

हा चर्चा विषय मनोगतींकडून प्रकाशित झाला ही आनंदाची गोष्ट आहे पण मनोगताच्या प्रशासनाने अंक प्रकाशित करावा अथवा करू नये यावर निर्णय घ्यावा असे वाटते. आणि नकार असेल तर लगेच कळवावे निदान ही चर्चा थांबेल आणि या चर्चेमुळे मनोगताच्या साठवणुकीचा अपव्यय होणार नाही..(पडद्यामागे अंक निघावा /निघू नये म्हणून व्य. नि ने  संकेतस्थळाच्या तांत्रिक बाबीत ताण निर्माण होण्याची/ वाढण्याची शक्यताही ताबडतोब नाहिशी होईल:)०

मनोगताचा दिवाळी अंक नको असे म्हणणारे मनोगती असतील असे वाटत नाही त्यामुळे मनोगताविषयी इतर सदस्यांप्रमाणे वाटणाऱ्या आपुलकीमुळे आणि दिवाळी अंक असावा असे वाटते म्हणून काही मुद्दे मांडते आहे. पुढे मागे शोधा मध्ये निदान हे मुद्दे सापडतील..

• सर्व सदस्यांनी लेखन सुपूर्त करतेवेळीच चिकित्सक वापरण्याचे सहकार्य करावे. शुद्धलेखनाचे  बरेचसे काम मनोगताचा गमभन चिकित्सक करू शकेल,आणखी सखोल तपासणीसाठी  एक दोन सदस्यांनी अंकासाठी निवड झालेले लेखन तपासून योग्य ते बदल करावेत. लेखन प्रमाणित भाषेत आहे किंवा नाही किती प्रमाणात शुद्ध आहे हा निवडीचा निकष नसावा. त्या आधारावर नाकारण्यात येते असे अशुद्धलेखन मनोगतावर आढळत नाही.
• विषयाचे बंधन घालू नये असे मला वाटते. जाळ्यावरील दिवाळी अंकांची संख्या तशीही बोटावर मोजता येईल अशी आहे. पण दिवाळीअंकात मुद्दाम घळाघळा रडवणाऱ्या साहित्याचा समावेश नसावा..
• तीन  कथा, चार ललित लेख, दोन वैचारिक निबंध, दोन पुस्तक परिचय, दहा कविता असे स्वरूप असायला हरकत नाही.
  कथेसाठी शब्दमर्यादा २०००, ललित लेख- १८०० शब्द, निबंध- १५०० शब्द असे केले तर पीडीएफ अथवा संकेतस्थळावर अंक वाचायला अडचण येणार नाही.
• ऑगस्ट अखेर ही साहित्य सुपूर्त करण्याची अखेरची तारीख आणि बलिप्रतिपदा (पाडवा)ही अंक प्रकाशित करण्याची तारीख होऊ शकेल, सदस्यांनी  वरील सर्व मुद्द्यांवर आपले  मत द्यावे.
  जर प्रशासनाने संमती दिली तर
• जोडणी व्यतिरिक्त प्रशासनाचा समावेश नसल्यास उत्तम, त्यांच्या वेळाचा अपव्यय टळेल.
• साहित्य सुपूर्त करण्याची योग्य पद्धती प्रशासनाने ठरवावी( व्यनि, झाकलेले प्रतिसाद)

दिवाळी अंकासाठी सर्व प्रकारची मदत करण्याची माझी तयारी आहे. साहित्याची निवड कशी करायची/कोणते सदस्य/ अथवा  सर्व प्रवेशिकांचा समावेश करायचा त्यावर चर्चा व्हावी.

मनोगत विशेष म्हणून आजवरचे निवडक साहित्य अंकात घेणे हा मला सर्वात सोपा पण शेवटचा पर्याय वाटतो.