सूर्य आणि कार्य यांच्यांमधील 'र'च्या उच्चारणात मला काहीही फरक जाणवला नाही. आणखी एखाद्याकडून ही खात्री करवून घ्या.

आत्या आणि आत्त्या यांची गोष्ट वेगळी आहे. मराठी बोलीभाषेत अनेकदा एखादा शब्द महत्त्वाचा आहे हे दाखवण्यासाठी आघात देऊन अक्षराचे द्वित्त करायची पद्धत आहे. उदाहरणार्थ आता/आत्ता, आताशी/आत्ताशी, उद्या/उद्द्याच्या उद्द्या, सवाशेर/सव्वाशेर, नको/नक्को, (असे भुकेने नक्का जाऊ, थांबा करते गोड खाऊ !),  कोल्हापूर/कोल्ल्हापूर, बघा/बग्घा, बगी/बग्गी, वगैरे. मात्र हे फक्त बोलीभाषेपुरते, लिहिताने द्वित्त होत नाही; निदान तसे करू नये. आत्याच्या बाबतीत तसे काहीसे झाले असावे.

तसे पाहिले तर शब्दाच्या सुरुवातीला आलेला ड आणि मध्ये किंवा शेवटी आलेला ड यांच्या उच्चारांतही फरक असतो. वाडा आणि डावा या शब्दांचे उच्चार करून खात्री करून घ्यावी.  म्हणूनच इंग्रजीत वाडाचे स्पेलिंग Wara असे करतात. कुपवाडा, रुडकेला, रुडकी, खडकी, बांसवाडा यांच्या स्पेलिंगमध्ये डी च्या जागी आर् येतो, परंतु 'डमडम'मध्ये डी. हिंदीत हा फरक दाखवण्यासाठी 'ड'खाली नुक्ता देतात. मराठीत ही सोय आपण ठेवलेली नाही.

एवंच काय, सूर्य आणि कार्य यांच्या उच्चारपद्धतीत मलातरी फरक जाणवत नाही.