ताप प्रश्नांचा असा चढतोच आहे सारखा
एकही उत्तर बसेना का उशाशी... रात्रभर
- सुरेख. उत्तम कल्पना.
तो असावा चतुर किंवा गंजला हा आकडा
खेळुनी उंदीर गेला सापळ्याशी रात्रभर
- वा. चमकदार कल्पना.
खंगलेल्या चेहऱ्यावर वेडसर झुलते हसू
झुंज घेते स्वप्न त्याच्या वास्तवाशी रात्रभर
- कल्पना चांगली; पण निवेदन संदिग्ध.
एक आठी जागते आहे कपाळावर तिच्या
काय चुकले? उजळणी करतो मनाशी रात्रभर
- फारच छान. सूक्ष्म शेर!
शेवटी निसटून गेला एक अस्फुट हुंदका
केवढा सांभाळला होता उराशी रात्रभर
- वा...
जसजसा झालो शहाणा तसतसे झाले कमी -
भांडणे माझ्यातल्या मी माणसाशी रात्रभर
- छान.
एकंदर सुरेख गझल. शुभेच्छा.