तुम्ही काढलेली ऍ ची दोन्ही चित्रे माझ्या संगंणकाच्या पडद्यावर उमटलेलीच नाहीत. आणि यांत मला काही आश्चर्य वाटत नाही. तुम्ही टाइप केलेला मजकूर किंवा डकवलेले चित्र मला मुळाबरहुकूम दिसेलच असे नाही. तुम्हा वापरत असलेला न्याहाळक आणि त्याची आवृत्ती माझ्यापेक्षा वेगळी असेल तरी कधीकधी दोघांच्या दिसण्यात फरक येतो. युनिकोडच्या  संकेतस्थळावरचा ऍ मला कसा दिसतो? तर एक इंग्रजी 3 चा आकडा. त्याच्या मध्यभागातून नाही तर त्याच्या खालच्या अर्धगोलाच्या मध्यातून काढलेली एक आडवी रेघ. तिला जोडलेला स्वरदंड. आणि वर शिरोरेषेच्या वरच्या भागाला  कोनाऐवजी गोलाकार केलेले एक बरोबरचे चिन्ह..

हिंदी हस्ताक्षरी अ असाच असतो. इंग्रजी तीनचा आकडा काढून त्याच्या शेवटाला गाठ मारायची, आणि गाठीतून बाहेर पडून  हात न उचलता वरखाली जाऊन स्वरदंड काढायचा.  'क' कसा काढतात? आधी शिरोरेषा, तिला जोडून उभा स्वरदंड, आणि किंचित वर जाऊन स्वरदंडाच्या दोन्ही बाजूला दोन वर्तुळे.  हा 'क', 'ळ'च्या मध्यातून वर जाणारी रेघ दिसावी तसा दिसतो. त्याला 'र' जोडून क्र करताच येत नाही. युनिकोडवरची सर्वच अक्षरे अशी हिन्‍दी वळणाची आणि भेसूर आहेत.