विकलांग वाईट नाही, पण मराठीत रूढ झाला आहे असे वाटत नाही. संस्कृतमध्ये किंवा हिंदीत अपंग आहे की नाही ते माहीत नाही. अप + अंग असा असता तर अपांग हवा होता. तसाही नाही. म्हणूनच हिंदीतून आलेला विकलांग रूढ होऊ पाहतो आहे.
अपंग हा पंगु(लंगडा, लुळा) या अर्थानेच वापरात होता. आता गरज़‌ पडली म्हणून थोटा, आंधळा, बहिरा, मुका, तोतरा, फाटक्या ओठांचा, मतिमंद अशा सर्व अर्थाने उपयोगी पडत आहे.
मनोरुग्णचे तसे नाही. मनोरुग्ण, वेडपट, वेडसर वागणूक असलेला, वेड लागलेला, माथेफिरू, ठार वेडा, पिसाळलेला या मराठी शब्दांतल्या चढत्या पायऱ्या आहेत.(वेडपट व वेडा या शब्दांना बावळट, खुळा किंवा किंचित मूर्ख असा सौम्य अर्थही आहे.)   त्यामुळे गरज़‌ नसताना आलेला मनोविकलांग मराठी लोकांना आवडेल असे आज तरी दिसत नाही.