मग मोकळेपणाने ''बागडायचे'' कुठे? स्वच्छंद भटकंती कोठे करायची? इब्लिसपणाला मोकळी हवा कुठे द्यायची? शहराच्या काडेपेट्यांच्या घरांत आणि टिचकीभर मैदानात तर मोकळा श्वासपण घेता येत नाही. मग आंतरजालीय मैदानात माणसे आखाडे रचतात. कोणी अजून वेगळे गोषे धारण करतात तर कोणी मोकळा श्वास घेता यावा म्हणून इकडून तिकडे भटकत राहतात. ह्या प्रवासाला अजून रंजक बनवण्यासाठी मग चित्रविचित्र टोपणनावांचा खेळ रचला जातो. कधी ही टोपणनावे अशीच टाईमपास असतात किंवा कधी गुणदर्शक किंवा कधी मनातली आवड व्यक्त करणारी.

कोणी आवडत्या पदार्थाचे/ अभिनेत्याचे/ व्यक्तीचे/फुलाचे नाव घेते.... कोणी आवडत्या स्थळाचे, कोणी स्वतःतील आवडत्या गुणालाच टोपणनाव बनवते तर कोणी ''दुर्गुणा''चे नावही घ्यायला मागेपुढे पाहत नाही. त्यात फार ''सीरियस'' असे काही नसते. आरशातल्या आपल्या प्रतिबिंबाला लहानपणी आपण जाता येता जसे वेडावून दाखवायचो, तसेच काहीसे!!!

अर्थात हे सर्व माझे वैयक्तिक मत आहे. लोकांचे टोपणनाव घेण्यामागे अजून काही व्यावहारिक/ अर्थपूर्ण दृष्टीकोनही असू शकतील. उदा. एखाद्या प्रसिद्ध व्यक्तीला जर कोणालाही आपली ओळख न कळू देता लेखन करावयाचे असेल तर ती नक्कीच टोपणनाव वापरणार! असो. अजून इतरांचे दृष्टीकोनही जाणून घेण्यास आवडेल!!