योनिशुचितेला आजही आपल्याकडे समाजात प्रचंड महत्त्व दिले जाते. स्त्रीचे चारित्र्य म्हणजे काचेसमान असते वगैरे वगैरे पाठ आजही घरांघरांतून ऐकायला मिळतात. बदलती गुन्हेगारी परिस्थिती जर नियंत्रणात येत नसेल वा आणता येत नसेल तर असे सांगणे/ मानणे/ समजणे आजच्या काळात कितपत योग्य आहे? बलात्कारित किंवा अत्याचारित स्त्रीविषयी समाजाचा दृष्टीकोन बदलायला हे फार आवश्यक आहे असे मला वाटते. बलात्कारामुळे शरीराबरोबरच स्त्रीच्या मनावरही अत्याचार होतो. पण समाजाने त्याकडे एक ''अपघात'' म्हणून पाहिल्यास तीच स्त्री त्यातून लवकर सावरू शकेल.

तसेच शालेय जीवनातच सुयोग्य प्रकारे मुलांना लैंगिक शिक्षण देणे अतिशय गरजेचे वाटते. आजकाल मुलांना माध्यमांमुळे सर्व प्रकारचे नको ते ज्ञान असते. परंतु शास्त्रीय व सामाजिक माहितीवर आधारित लैंगिक ज्ञान देणे, तसेच आपल्या भावनांचे व्यवस्थापन करायला त्यांना शिकवणे ही आता काळाची गरज बनले आहेत.

ज्या समाजात स्त्रीवर एवढ्या प्रमाणात अत्याचार होतात तो समाज सुसंस्कृत वा प्रगत कसा काय होऊ शकतो? कोणावरही आपल्या बलाचा दुरुपयोग करून अत्याचार करणे ही सामाजिक दुष्प्रवृत्ती मिटवण्यासाठी व कमी करण्यासाठी तितकेच ठोस व सकारात्मक सामूहिक प्रयत्न हवेत.

पाश्चात्यांचा चंगळवाद आपल्याकडे रुजला पण प्रत्येक स्त्रीकडे फक्त एक भोगवस्तू म्हणून न पाहता तिच्याकडे ''माणूस'' म्हणून पाहण्याची संस्कृती कधी रुजणार?