मराठीत अनीय हा प्रत्यय लागणारे शब्द नाहीत असे अध्याहृत विधान मी केलेले नाही.
नावाआधी हा शब्द शब्दकोशात का सापडावा? 'आधी' शब्दयोगी अव्यय आहे ते कोशात मिळेल. नावही मिळावा. प्रत्ययांप्रमाणेच शब्दयोगी अव्यय शब्दाला जोडण्याआधी त्या शब्दाचे सामान्यरूप होते. नाव+आधी=नावा+आधी=नावाआधी. या जोडशब्दाचे एवढे नवल का वाटावे? हा शब्द कोशात शोधण्याची इच्छा का व्हावी?
उपक्रमावर संग्रहणीय या शब्दाची इतकी विविधांगी(हा शब्द कोशात मिळेल याची खात्री देता येत नाही!)चर्चा झाली आहे, की यापुढच्या काळात कोणी मराठीत संग्रहणीय म्हणण्यालिहिण्याची हिंमत करणार नाही; इतकेच नव्हेतर, सहवास हा शब्द लिहायलापण मराठी माणूस कचरेल.
मराठीत आपण करत नसलो तरी हिंदीप्रमाणेच तेलुगूतही संस्कृत शब्दांचा भरमसाठ वापर करतात. मनोगतावरच पूर्वी प्रसिद्ध झालेल्या एका लेखात तेलुगू वर्तमानपत्रांतील काही बातम्यांचे मराठी भाषांतर दिले होते. देताना त्यातले संस्कृत शब्द जसेच्या तसे ठेवले होते. ते लिखाण वाचताना संस्कृत शब्द अशा वेगळ्या अर्थांनीही देशी भाषांत वापरात आहेत हे समजून करमणुकीबरोबरच आश्चर्याचा धक्का बसला होता. कुणाला तो लेख मनोगतावर शोधता आला तर फार बरे वाटेल.
मूळ संस्कृत असलेल्या शब्दाचा संस्कृतमध्ये किंवा अन्य भाषेत जो अर्थ असेल तो मराठीत असायलाच पाहिजे असे नाही. इंग्रजी शब्दाचे अमेरिकन अर्थ मूळ ब्रिटिश अर्थापेक्षा भिन्‍न असतात हे सर्वज्ञात आहे.
केवळ भाषेत प्रत्यय आहेत म्हणून ते लावून शब्द बनत नसतात. कोणत्या रूपाला कोणता प्रत्यय लावायचा याचे अलिखित संकेत असतात, ते पाळायलाच पाहिजेत.---अद्वैतुल्लाखान