अनेक मराठीभाषक लोकांकडून मला कळले,  की "संग्रहणीय" शब्दाचा अर्थ "संग्रह करण्यायोग्य" असा अर्थ त्यांना समजून येतो.

हा बदल स्वागतार्ह आणि म्हणूनच अतिशय आनंददायक आहे. सुमारे ३० वर्षांपूर्वी मी 'संग्रहणीय' असा वापर केल्यावर ऐकणाऱ्याच्या चेहऱ्यावर नापसंतीची भावना दिसलेली होती, त्या पार्श्वभूमीवर वरील बदल नक्कीच चांगला म्हणावा लागेल.

या (आणि अशा अनेक) शब्दांचा वारंवार वापर करून अधिकाधिक लेखन करत गेल्यास असे शब्द रूढ होण्यास मदत होईल. कालांतराने कदाचित संदर्भानुसार दोन्ही अर्थांनी हा शब्द स्वीकारला जाईल. (म्हणजे रोग उपचार आदिसंदर्भात जर चर्चा चालू असेल तर 'संग्रहणीय' म्हणजे 'संग्रहणीस कारण होणारा' आणि इतर संदर्भात 'संग्रह करण्यासारखा' ... असे दोन्ही अर्थ प्रचारात येऊ शकतील. )

ह्याला उदाहरण द्यायचे तर 'विषय' आणि 'काम' ह्या दोन नेहमीच्या शब्दांचे देता येईल.

हे दोन्ही शब्द प्रत्येकी दोन वेगवेगळ्या अर्थांनी मराठीत सुखाने नांदत आहेत. (त्यांवर उलटसुलट अर्थांनी विनोदही खूप झालेले आहेत! ) त्या दोन्ही अर्थांची एकमेकांना कधी अडचण आली नाही, तसेच संग्रहणीय शब्दाचे होईल, असे वाटते.