सुसंस्कृत म्हणून स्वत:ला म्हणवून घेताना, केवळ आमची माणसे मारली म्हणून ती मारणाऱ्या माणसांना मारणे हे किती न्यायसंगत आहे असा त्यांनी सवाल केला होता. माणसे मारणे हे जर मुळातच चुकीचे समजून त्या बद्दल आपल्याला चीड येत असेल तर तेच कृत्य आपण केवळ राजकीय यंत्रणेच्या आड दडून करत असू तर आपण आरश्यात स्वत:ला कसे बघू धजावतो? माणसे सगळीच मुलत: चांगली वा वाईट म्हणून जन्माला येतात का? त्यांच्या ते तसे होण्याला जी काही कारणे असतात त्यांवर त्यांचा पूर्ण अंकुश असतो का? या सगळ्याचा आपण आपल्यासाठी जेवढ्या सहिष्णूपणे विचार करू शकतो तेवढाच विचार देश, धर्म , जातीच्या पलीकडे जाऊन 'आपण' जे ' हे विश्वची माझे घर' म्हणणाऱ्या ज्ञानेश्वरांची पताका अभिमानाने मिरवितो त्यांनी करायला नको का? कसे आहे मित्र हो, आपण म्हणजे 'नागरी माणूस' हा ढोंगी आहे, असे माझे व्यक्तिगत मत आहे. स्वत:च्या गरजेप्रमाणे आपण आपले नियम संकेत मुरडतो. जिची मुले मारली गेली ती आई त्या खुन्याचा तळतळाट करत त्याच्या चिंधड्या कराव्या अशी मागणी करते, तेंव्हाच त्याची आईही रडतभेकत आर्जवे करीत असते 'माझा पोर गुणी होता हो पण कधी कसा कोणी या व्यसनाला फितवला कळले नाही.' कुठली 'आई' सच्ची हे आपण कसे ठरवावे? खरचं आपण दुसऱ्याचे संगोपन/ शिक्षण कसे झाले याची चिरफाड करू शकतो का? व्यसनी माणसाला जसे आज आपण वेगळ्या दृष्टीने पाहू लागलेलो आहोत की, व्यसन त्याला भाग पाडते पुन्हा पुन्हा त्या मार्गावर जाण्यासाठी. आज जसे आपण आरोप करू शकत नाही की 'त्या व्यसनी माणसाला स्वतंत्रपणे विचार करता येत नव्हता का? सगळे दिसत असूनही का आपली धूळधाण करून घेतली' कारण त्याची कारणे मेंदूच्या पातळीवर घडतात. त्याचप्रमाणे ही 'देशद्रोही' माणसे कुठल्या प्रकारच्या व्यसनांची शिकार आहेत त्याचा समंजसपणे विचार करणे हे सुसंस्कृत समाजातील समंजस व्यक्तीने करायला नको का?