कळू लागले जेव्हा मज आशय स्वप्नांचे
कळू लागले, सरले आहे वय स्वप्नांचे

कुठून आणू धुंदी आता तरुणपणाची?
बंद कधीचे पडले मदिरालय स्वप्नांचे

एक जातसे पूर्णत्वाला, लाख भंगती
काय करावे मोल अशा मृण्मय स्वप्नांचे?

निद्रिस्तांच्या दिग्विजयाची दौड रात्रभर
बळी दिले जातात पहाटे हय स्वप्नांचे

ऑथेल्लो मी, मीच इयागो, डेस्डिमना ती
किती अकारण घ्यावे मी संशय स्वप्नांचे

मिलिंदजी,
--------- हे सारेच शेर नेहमीप्रमाणे दर्जेदार! मतला, हय, संशय विशेष.

-- जयन्ता५२