हर्षलजी! आपल्यासाठी ही आमची खूप जुनी गझल देत आहे! अभिप्राय जरूर कळवा!
मायबोलीवरील जुन्या गझलांचे बहुतेक स्थलांतर करण्यात आले असावे! तिथे फारच खडाजंगी असते! आपण पाहिले असेलच!
गझल
अरे, फुलांचा सुगंधही मी दुरून घेतो!
अलीकडे मी, ऋतू ऋतू पारखून घेतो!!

कशास मी आर्जवे करावी तुझी वसंता?
हरेक मी श्वास केवढा मोहरून घेतो!

असे नव्हे की, इजा व्यथांनीच फक्त केल्या;
सुखासही आजकाल मी पाखडून घेतो!

मला करावेच लागते वज्र काळजाचे;
हरेक माणूस आयुधे पाजळून घेतो!

नवीन नाही मला असे बेचिराख होणे;
अलीकडे रोज मी मला सावडून घेतो!

उगाच सोन्यासमान येते न ओळ ओठी;
मनात एकेक शब्द मी पालखून घेतो!

-------प्रा.सतीश देवपूरकर
भूशास्त्र व खानिज तेल तंत्रद्न्यान विभाग,
नौरोसजी वाडिया महाविद्यालय, पुणे.
फोन नंबर: ९८२२७८४९६१