"हार्दिक" हेच रूप बरोबर आहे, "हार्दीक" हे नव्हे.

मनोगतचा शुद्धलेखनचिकीत्सक "हार्दिक" हा शब्द चूक व त्याला "हार्दीक" हा बरोबर पर्याय दर्शवतो. तसेच "नेहमी चुकणारे शब्द" मध्येसुद्धा हा शब्द "हार्दिक" चूक व "हार्दीक" बरोबर असा नोंदवला गेला आहे. परंतु या शब्दातील प्रत्यय "इक" हा तद्धित प्रत्यय आहे, "ईक" नव्हे. "इक" या तद्धित प्रत्ययाच्या नियमांच्या पुढील विवेचनावरून व पुढे दिलेल्या उदाहरणांवरून, "हार्दिक" हेच रूप बरोबर आहे, "हार्दीक" हे नव्हे, हे सहज लक्षात येईल. (स्रोत: http://sanskrit-sanscrito.com.ar/english/sanskrit/sanskrit9intro.html#Taddhitapreliminarystudy)

"इक" हा तद्धित प्रत्यय लागताना पुढील नियम लागू होतात:

1. ज्या शब्दाला "इक" प्रत्यय लावायचा, त्या शब्दातील प्रथम स्वराची (बहुधा) वृद्धी होते.
2. तो शब्द व्यंजनांत असल्यास अंत्य व्यंजनात काहीही बदल होत नाही.
3. तो शब्द स्वरांत असून अंत्य स्वर अ,आ,इ,ई यांपैकी असल्यास अंत्य स्वराचा लोप होतो.
4. तो शब्द स्वरांत असून अंत्य स्वर उ,ऊ यांपैकी असल्यास अंत्य स्वराचा गुण होतो. (बहुधा अंत्य स्वर ऋ,ॠ,ऌ,ॡ यांपैकी असल्याससुद्धा हाच नियम लागू होत असावा असा अंदाज आहे, परंतु नक्की माहिती या क्षणी हाती नाही.)
5. तो शब्द स्वरांत असून अंत्य स्वर ओ,औ यांपैकी असल्यास अंत्य स्वरात काहीही बदल होत नाही.
6. तो शब्द स्वरांत असून अंत्य स्वर ए,ऐ यांपैकी असल्यास लागू होणाऱ्या नियमाविषयीची माहिती या क्षणी हाती नाही.
7. तो शब्द जर जोडशब्द / सामासिक शब्द असेल, तर प्रथम स्वराच्या वृद्धीचा नियम पहिल्या शब्दाबरोबरच दुसऱ्या शब्दालासुद्धा कधीकधी लागू पडू शकतो. (पण नेहमी नव्हे.)
8. वरील सर्व नियम लागू झाल्यानंतर मग संधीच्या सामान्य नियमांना अनुसरून शब्दास "इक" हा तद्धित प्रत्यय लागतो.

उदाहरणार्थ:

मूळ शब्द: "शरीर" पासून (नियम १ लागून) "शारीर" पासून (नियम ३ लागून) "शारीर्" + (नियम ८ लागून) "इक" = "शारीरिक".

मूळ शब्द: "बुद्धी" पासून (नियम १ लागून) "बौद्धी" पासून (नियम ३ लागून) "बौद्ध्" + (नियम ८ लागून) "इक" = "बौद्धिक".

याचप्रमाणे, मूळ शब्द: "हृद्" पासून (नियम १ लागून) "हार्द्" पासून (नियम २ लागून) "हार्द्" + "इक" = "हार्दिक".

(शुद्धलेखनचिकीत्सकामध्ये व "नेहमी चुकणारे शब्द" या पुस्तकात योग्य ती दुरुस्ती करण्यासाठी प्रशासकांना व्यक्तिगत निरोप पाठविलेला आहे.)

- टग्या.

ता.क.: तेव्हा सर्वांना दिवाळीच्या हार्दिक शुभेच्छा, हार्दीक नव्हे! ;-)