कणा

'ओळखलंत का सर'--- पावसात आला कोणी
कपडे होते कर्दमलेले केसावरती पाणी

क्षणभर बसला नंतर हसला बोलला वरती पाहून
'गंगामाई पाहुणी आली, गेली घरट्यात राहून

माहेरवाशीण पोरीसारखी चार भिंतीत नाचली
मोकळ्या हाती जाईल कशी- बायको मात्र वाचली--

भिंत खचली चूल विझली होते नव्हते नेले
प्रसाद म्हणून पापण्यांमधे पाणी थोडे ठेवले--

कारभारणीला घेऊन संगे, सर आता लढतो आहे
पडकी भिंत बांधतो आहे. चिखल गाळ काढतो आहे'--

खिशाकडे हात जाताच हसत हसत उठला
'पॆसे नकोत सर जरा एकटेपणा वाटला--

मोडून पडला कणा तरी मोडला नाही कणा
पाठीवरती हात ठेवून नुसते लढ म्हणा.'