तेव्हा प्रा एन डी नगरवाला इंग्रजीतून समालोचन करीत. पुणे आकाशवाणी, नगरवाला, ना सी फडके इ. मराठी आणि क्रिकेटप्रेमी लेखक वगैरेंच्या पुढाकाराने आणि सहकाराने क्रिकेटची ही परिभाषा (झेल, तटवणे, चौकार, षटकार, षटक, पायचीत, धावचीत, क्षेत्ररक्षण, व्यूहरचना .... अशी) विचारपूर्वक तयार केली असे कळते. (चू.भू.द्या.घ्या.) नगरवालांचे इंग्रजी समालोचन सर्वांनीच ऐकलेले असे. पण पारशी नववर्षदिनाची माहिती सांगायला त्यांना आमच्या शाळेत बोलावलेले असताना त्यांनी अस्खलित मराठीतून ती माहिती सांगितली. त्यांचे मराठीवरील प्रेम आणि प्रभुत्व पाहून सर्व शिक्षक आणि विद्यार्थी थक्क झाले होते. "आज अग्निमंदिरात मी गेलो नाही पण ह्या विद्यामंदिरात येण्याचे पुण्य मला मिळाले" हे त्यांचे तेव्हाचे वाक्य माझ्या आज सुमारे पस्तीस वर्षांनंतरही लक्षात आहे ते त्यांच्या त्या मराठी नैपुण्यामुळेच.