तुझ्या आठवांना उजाळाच देतो..
खरी सावली हा उन्हाळाच देतो..
हिऱ्याला खऱ्या मोल नाही अताशा..
गड्या, ये तुला मी 'खरी' काच देतो!
वसंतातही जोर नाही जुना तो..
आता खास ना मोगरा जाच देतो!!
कितीही करा प्रार्थना त्या, तरीही..
खऱ्या वेदना 'तो' अम्हालाच देतो!!
कधी दोष माझे मलाही दिसावे...
कसा दोष मीही कुळालाच देतो!
नको दानवीरा.. तुझ्या वल्गना त्या..
कुणा एक देतो... कुणा पाच देतो!!
कसा काळ हा काढला काय सांगू?
तुला आसवांचा पुरावाच देतो!!
