दोन अंडी उकडून घ्यावीत. गार करून सोलावीत / सोलून गार करावीत.

कांदे नि टॉमेटो बारीक चिरून घ्यावेत. मिरच्या आवडीप्रमाणे कापून घ्याव्यात.

कढईत तेल तापवावे. धुरावल्यावर ज्योत बारीक करून मिरच्या घालाव्यात. मिरच्यांचा खाट गेला की हळद घालून हलवून घ्यावे.

चिरलेला कांदा घालून ज्योत मोठी करावी. कांद्याचा रंग पालटू लागला की गरम मसाला घालावा. मसाला नीट लागला की चिरलेले टॉमेटो घालून ज्योत मोठी करावी. कांद्या-टॉमेटोपुरते मीठ घालावे.

उकडून सोललेली अंडी बारीक चिरून घ्यावीत.

कांद्या-टॉमेटोचे तेल सुटू लागले की उकडलेली-चिरलेली अंडी घालून ज्योत बारीक करावी. सगळे सारखे करून घेतल्यावर ज्योत मोठी करून दोन कच्ची अंडी फोडून सगळ्या मिश्रणात घालावीत. अंड्यांपुरते मीठ घालून पटापट हलवत रहावे. फोडून घातलेली कच्ची अंडी आळल्यावर गॅस बंद करावा.