शिवदास यांचे मुखपृष्ठावरील शिवसुक्त मी इथे सादर करीत आहे.

                                      शिवसुक्त

राजियामाजी ऐसा राणा,जे ठायी सकळ राजयोग खुणा

शैशव्युत्पन्न, अखंड कार्यरत धर्मकारणे॥१॥

समाजकारण ते धर्मकारण,धर्मकारण ते राजकारण

दुष्ट म्लेंच्छांचे निर्दालन, पीडित कष्टी स्वजनांचे पुनरुज्जीवन॥२॥

साधुसंतांसी उत्थापन, खलीचे समूळ निर्दालन,अबल, दुर्बळांचे तारण

अखंड परोपकाराचे धोरण, ते हे राजधर्माचे कारण ॥३॥

धरित्री नव्हे ही भूमाता, कामधेनू ती गोमाता

परस्त्री ही केवळ माता, अखंड रक्षिले सर्वांसी ॥४॥

क्षात्रतेज बळवंत, राजनिष्ठ कुळवंत, धन्य ही जिजाऊ,चरणी त्रिवार वंदन

उपरती जगज्जननी, स्फ़ुर्तिदायिनी भवानी, बुद्धीचे आगर कारभारी धुरीण पंतजन ॥५॥

बाजी, मुरार, तान्हा, शिवा काशिद,स्वामीनिष्ठ अवघे, धारातीर्थ पावन

फेडिले जन्मजन्मांतरीचे ऋण, धन्य पुनित ही मऱ्हाटभूमी, दशदिशा सहस्त्रमुखे करिती शिवधर्म स्तवन ॥६॥

चैतन्यशिरोमणी तो हा जाणता राजा, नांदे जयेचेण सकळठायी चैतन्य मूर्तिमंत

उजवली कूस शिवनेरी,परमप्रताप प्रतापगडी, मस्तकाभिषेकी रायगड, पूर्वसंचित जया थोर, तो हा सह्याद्री भाग्यवंत ॥७॥

शिवदास.

(बाबासाहेब,आप्पा आणि कवी यशवंत हे माझे प्रेरणास्त्रोत! कर्तिकरविती ती जगज्जननी आदिशक्ती तुळजाभवानी,या सर्वांस भक्तिभावे अर्पण...)