नकळत घडले सारे काही, पडले अन प्रेमात तुझ्या ।
प्राण गुंतले, चित्त हरपले, मादक या नयनात तुझ्या ॥
श्यामल वर्ण, सतेज कांती, मुख चंद्रमा चमचमता ।
ताम्रसुरेची नशा अनोखी, लालस या ओठांत तुझ्या ॥
कधी खुणेने जवळ बोलवी, अशी मूक देहभाषा ।
कधी लज्जेने चूर करी, संकेत असा हास्यांत तुझ्या ॥
कधी ओठांचे नाजुक चुंबन, कधी हलकीशी कमळमिठी ।
कधी दिलाचा वेग वाढवी, आवेग असा बाहूंत तुझ्या ॥
होती पूर्वी एक किशोरी, सुजाण, सक्षम अन मुक्ता ।
आज कोण ही प्रेमदिवाणी, कैद पुरी कैफात तुझ्या ॥
