माझ्या गोष्टी कितीतरी गं तुझ्याचपाशी !
माझ्या गोष्टी, कितीतरी गं तुझ्याचपाशी !
वळिवाची सर,गारा होत्या पडल्या तेव्हा,
मातीचा पण वास अजूनी,तुझ्याचपाशी !
वनराईतिल रात्री हिरवट, तृप्त सावल्या
त्या रात्रींची स्वप्ने अजुनी तुझ्याचपाशी !
श्वासांमधली उष्ण सुरावट, अबोल बंदिश
तान, समेवर भिनलेली ती,तुझ्याचपाशी !
दूर देवळामधल्या घंटा, किणकिण मंजुळ
पहाटवेळा अशा गुलाबी,तुझ्याचपाशी !
तसेच सारे, परी वेगळे रंग आजचे,
रंगांचे भरलेत कुंचले,तुझ्याचपाशी !
माझे माझे कशा म्हणू मी? तुझेच सगळे,
तुझेच सगळे,तुझे 'तुझेपण'माझ्यापाशी !
