आज माझ्या देशात देवा - सारं काही ठीक आहे ...
काही गरीब, कंगाल काही - काही मात्र श्रीमंत आहेत |
जगण्याच्या लढाई मधे , जनता सारी व्यस्त आहे
महागाई, भ्रष्टाचाराने , थोडी फार त्रस्त आहे |
रस्त्यांवर चारचाकी, रोज रोज वाढत आहेत
त्या खाली चिरडून सुद्धा , रोज काही मरत आहेत |
पावसाच्या काही सरी, नेतात रस्ते पाण्याखाली
नागरिकांचे सेवक मात्र, मागतात थोडी चिरीमिरी |
बॉम्बस्फोट आणि गँगवॉर - सारं काही सुरळीत आहे
चौका चौकात सिग्नलला - भिकारी देखील खूप आहेत |
अणू स्फोट करुन काही - भारत शक्तीशाली होतो
समुद्रातून येउन मृत्यु, रस्त्यांवर थैमान घालतो |
लोकांनाही त्याचे भय, आता फारसे वाटत नाही
मोठ्या मोठ्या शहरांसाठी, अशा घटना विशेष नाहीत |
धर्मांधतेची जीत सदा - सहिष्णुता पराजीत आहे
थोडे फार भांडण, तंटे ....
पण बाकी सगळं ठीक आहे |
आज माझ्या देशात देवा
सारं काही ठीक आहे ...
कुठे पूर , कुठे दुष्काळ - शेतकर्‍याच्या गळा फास
भेगाळलेल्या जमिनी मधे - माय-लेकराची अश्रुधार |
धान्य कुठे सडते अन् - तळमळते कुठे उपाशी पोर
मिजासी मधे धनदांडगे अन् सामान्याच्या जीवा घोर |
चोरांचीच इथे शिरजोरी - सामान्याला मात्र काठी
बळी तोच कान पिळी - मग कायदे कानून कोणासाठी? |
औषध नाही, डॉक्टर नाहीत - साथीचे सारे रोग आहेत
संशोधन अन् प्रयोंगांसाठी - गिनीपिग्ज् इथे खूप आहेत |
रस्ते नाहीत, शाळा नाहीत - वीज आणि पाणि नाही
कोणाला तू साकडे घालतोस? - नशीब तुझे सरळ नाही |
उन, थंडी, वारा, पाऊस - लेकरा, नको रे जेवण मागूस |
लाल दिव्याच्या गाडीला - उगीच नको बोल लावूस |
विठ्ठलाच्या भेटी साठी - वारकरी आसूसलेला
चंद्रभागेचा पान्हा - पण एकदशीला आटलेला |
शिर्डीच्या फकीराला बघ , रेशमाची शाल आहे
सामान्याला वस्त्र नाही ...
पण बाकी सगळं ठीक आहे |
दारिद्र्याने गांजलेल्या , लोकांचा थोडा क्षोभ आहे
सुख थोडे , दु:ख फार ....
पण बाकी सगळं ठीक आहे |
आज माझ्या देशात देवा
सारं काही ठीक आहे ...