ऊठ मर्दा ऊठ

आवळून घे मूठ

हाण त्याच्या टाळक्यात 

पायामधला बूट 

सत्तेपुढे शहाणपण

हेलकावे खाते

माणुसकीचे लचके तोडून

लाचखोर खाते

पौरुषाच्या नशेचे, तेव्हा लाव दोन घूट 

अन्

हाण त्याच्या टाळक्यात, पायामधला बूट 

अन्यायाची सीमा जेव्हा

मर्यादेला लांघते

तुझे हक्क तुडवून

तिरडीवर बांधते

शेपटी नको खाली करू, वाघासारखा ऊठ

अन्

हाण त्याच्या टाळक्यात, पायामधला बूट 

पोशिंद्याच्या छाताडावर

हरामींच्या मौजा

तेव्हा राज्य करतात

लुटारूंच्या फौजा

सत्ता आणि दलालांची, कर ताटातूट

अन्

हाण त्याच्या टाळक्यात, पायामधला बूट 

माय तुझी बैलावाणी

राबराबून मेली

गल्लीमध्ये मुळं अन्

दिल्लीमध्ये वेली

तिचे फळ एकएक अभयाने लूट

अन्

हाण त्याच्या टाळक्यात, पायामधला बूट

                                                    गंगाधर मुटे

------------------------------------