पुन्हा हुलकावणी देऊन गेले मेघ काळे
कितीदा कोरडे गेलेत सारे पावसाळे                      ||धृ||

कितीदा येउनी आच्छादुनी आभाळ गेले
धरेच्या अंग-प्रत्यंगात लावुन जाळ गेले
कशाला दाह वाढवण्यास करती थेंब चाळे?              ||१||

कधी लागेल, देवा, क्षेत्रपालाला सुगावा?
कधी भिडणार धरणीला तिचा अनिरुद्ध रावा?
कधी होतील गंधित चिंब भिजुनी देहवाळे?              ||२||

कशी हो एकटी फळणार ही सुजलाम माती?
भिजवल्यावाचुनी ठरणार आहे वांझ माती
किती आसूसली ऐकावया घुंगूरवाळे                     ||३||