बरेच दिवस झाले
एकतर्फीच चालू आहे आपला संवाद
मी एकटाच बोलतोय
तुझ्यापर्यंत पोचतंय, नाही पोचतंय, कुणास ठाऊक.
पोचत असेलच म्हणा.
तुझे मूक प्रतिसाद जाणवलेत मला कितीतरी वेळा.
आणि जाणीव करून दिलीय
की आपण देह दोन असलो तरी अभिन्नत्व नाही आपल्यात
माझा अंश आहेच तुझ्यात
आणि तुझे अस्तित्व कारण बनावे माझ्या अस्तित्वाचे
इतके विस्तारलेय.

पण आता पुरे ही प्रतीक्षा.
प्रत्यक्ष भेट आता व्हायलाच हवी
धीर धरलाय मी पुरेसा
पुरेसा वेळ दिलाय तुलाही

आणि कोष सोडायलाच हवा कधीतरी ...