रामनवमीच्या निमित्ताने गीतरामायण ऐकावे असे वाटत होते. आता गीतरामायण म्हणजे सुधीर फडके असे समीकरणच होऊन गेले आहे.  सुधीर फडक्यांनी असंख्य कार्यक्रम करून ते बरेच लोकप्रिय केले हे खरे आहे. पण जेव्हा गीतरामायणाला आकाशवाणीवरून १ एप्रिल १९५५ साली सुरूवात झाली तेव्हा त्यात अनेक गायक गायिकांचा सहभाग होता. पण या गायक गायिकांच्या आवाजातली गाणी आता विस्मृतीत गेली आहेत (आता... असे म्हणायचे पण खरे सांगायचे तर मी ही गाणी यापूर्वी कधीच ऐकली नव्हती, एक लताच्या आवाजातल्या "मज सांग लक्ष्मणा" चा अपवाद वगळून) . सुदैवाने यूट्यूबवर १९५५-५६ मध्ये आकाशवाणीवर अनेक गायक गायिकांच्या आवाजात रेकॉर्ड झालेली मूळ गाणी उपलब्ध आहेत. खाली दिलेल्या दुव्यावर सर्व गाण्यांचा आस्वाद घेता येईल.