माझी आवडती कवीता :

 

ओळखलंत का सर मला

पावसात आला कोणी

कपडे होते कर्दमलेले

केसावरती पाणी

 

क्षणभर बसला, नंतर हसला

बोलला वरती पाहून

गंगामाई पाहुणी आली

गेली घरट्यात राहून

 

माहेरवाशीण पोरीसारखी

चार भिंतीत नाचली

मोकळ्या हाती जाईल कशी

बायको मात्र वाचली

 

भिंत खचली, चूल विझली

होते-नव्हते गेले

प्रसाद म्हणून पापण्यांमध्ये

पाणी थोडे ठेवले

 

कारभारणीला घेऊन संगे सर,

आता लढतो आहे

पडकी भिंत बांधतो आहे

चिखल गाळ काढतो आहे

 

पैशाकडे हात जाताच

हसत हसत ऊठला

पैसे नकोत सर

जरा एकटेपणा वाटला

 

मोडून पडला संसार

तरी मोडला नाही कणा

पाठीवरती हात ठेवून

नुसते लढ म्हणा

                           -- कुसुमाग्रज