भूलून गेलो , उडून गेलो प्रीतवारा भिरभिरला
लूटून नेला गर्भ उद्याचा, वर्तमानही हादरला !
सौंदर्याची सीमा आम्ही ठरवली नव्हती
पुरी झाली खात्री अता खट्याळ मनाला!
बट मागे सारताना पदराशी खेळताना
हाय अशी लाजलीस त्यास उपमा कशाला ?
दूर तू उभी असून ,भासतेस जवळ तू
अपुल्यातील अंतराचा श्वास बरा संपला !
शब्द सारे कुचकामी, तव अधरांवर लडबडले
सांडलीच मदीरा मग , काळ झिंग झिंगला!
उरी माझ्या काळजाची , धडधड या थांबेना
कसलयाशा वेदनेने , क्षण पुरा थरारला !
