चाट:
काबुली चणे रात्री कोमट पाण्यात चिमूटभर सोडा घालून (जास्त सोड्याने चव बिघडते.) भिजत ठेवावेत. सकाळी चणे आणि १ बटाटा कुकरमधे शिजवावा. (छोले नीट न भिजल्यास शिजायला वेळ लागतो.म्हणून छोले संध्याकाळी भिजवले तरी चालेल.)
तेल, जिरे यांची फोडणी करुन त्यात कांदे व टॉमेटो मोठे चिरुन परतावे. हे मिश्रण थंड झाल्यावर थोडे चणे, १ उकडलेला बटाटा,मिरच्या,आले,लसूण यासह मिक्सरमधे फिरवावे. आता हे मिश्रण परतून त्यात उरलेले चणे व मसाला मीठ, हवे असल्यास दही टाकून मंद आचेवर परतावे. घट्टसरच बनवावे.
बास्केटस:
कच्चे बटाटे सोलून किसून कागदावर वा कापडावर दाबून कोरडे करावे. हा पाण्याचा अंश जवळजवळ नसलेला किस धातूच्या गाळण्याच्या बाजूना आतून सर्व ठिकाणी समान थर देउन दाबावा. आता तेल तापवून हात न भाजता गाळणे तेलात धरुन हि बास्केट सोनेरी रंगावर तळावी. अशा ७-८ बास्केट (पहिल्या १-२ बिघडतील, पण नंतरच्या नक्कीच जमतील.) तळून घेउन टिश्यु कागदावर तेल निथळण्यास ठेवाव्या. मग अलगद गाळण्यातून बास्केट काढावी. (२ गाळणी असल्यास पॅरलल प्रोसेसिंग करता येइल.)