"हॅलो"
"हॅलो, कशी आहेस? "
"ठीक"
"काय म्हणते तयारी? "
"कसली तयारी? "
"लग्नाची, अजून कसली तयारी विचारणार मी ? "
"लग्न मोडलं माझं... "
"का? तुला पसंत नव्हता का तो? "
"त्याला माझे मित्र पसंत नव्हते. "
"मग? "
"तो म्हणाला, लग्नानंतर अशी मैत्री मला चालणार नाही. मीही संतापले, आणि असं असेल तर लग्न मोडलं समज म्हणाले... "
"मग तो काही म्हणाला ? "
"नाही. त्याच्या वडिलांनी फोन करून सांगितलं, की त्यांना अशी मुलगी नकोय जिचे लग्नाआधी मित्र असतील."
"व्वा ! फारच छान ! "
"छान ? "
"हो. अभिनंदन !!! "
"अरे लग्न मोडलय म्हणाले मी, ठरलं नाही".
"कळलं मला... "
"मग तु माझं सांत्वन करायचं सोडून अभिनंदन काय करतोय? "
"मला एक सांग, हेच जर लग्नानंतर झालं असतं तर.... ? "
"....... "
"लकी आहेस तु"
"लकी? "
"हो. बऱ्याच मुलींना लग्नानंतर कळतं..... मग होते त्यांची घुसमट... तु सहन करू शकली असतीस ? "
"नाही"
"म्हणून तर म्हटलं की तु लकी आहेस.... कम ऑन यार.... चिअर अप.... हास जरा"
"खरं आहे तुझं. थँक्स यार. .... खरच तु माझा खरा मित्र आहेस...."
