हे ईश्वरा,
मला रस्त्यातला दगड बनवू नकोस
कुणास ठेच लागण्यासाठी...
त्या पेक्षा राहीन घराच्या भिंतीत
कुणा गरीबाच्या निवाऱ्यासाठी...
हे ईश्वरा,
मला पाण्याचा थेंब बनवू नकोस
अळवावर मिरविण्यासाठी...
त्या पेक्षा कामी येऊदे
एखाद्याची तहान शमविण्यासाठी...
हे ईश्वरा,
मला नुसतंच फुल बनवू नकोस
बागेत शोभण्यासाठी...
त्या पेक्षा येईन तुझ्या पायाशी
एखाद्याच्या इच्छापूर्तीसाठी...
हे ईश्वरा,
मला नुसताच शब्द बनवू नकोस
कुणाची उणीदुणी काढण्यासाठी...
त्या पेक्षा राहीन एखाद्या अभंगात
तुझे गुण गाण्यासाठी...
अजय
