असे का गजानना?

गणनायकाची केली या भारताने भक्ती,
सदा आक्रमणे का असे आपुली नियती?

जुलमी ती मोगलाई मग इंग्रजांची सत्ता,
का न टाळता आली तुला सुखकर्ता ?

विघ्नहर्ता तू असता एकदंत,
का झालेत हे  दहशतवादी उन्मत्त?

आहेस तू विद्येची देवता,
देशात का तरी निरक्षरता?

चौसष्ट कलांचा तू आहेस स्वामी,
तांडे बेकारांचे का न होती कमी?

सर्वत्र भरले एकच ईश्वरी तत्त्व,
मग का एकाच "राजाला" एवढे महत्त्व?

पाहिल्यावर हा सारा विरोधाभास,
न राही तुझ्यावरही विश्वास..

इंग्रज, अमेरिकी, चीन्याना न  तू पूज्य,
कला, क्रीडा, विज्ञानवर तरी त्यांचेच अधिराज्य.

लोकसंख्येत आहो आम्हीही अब्जाधीश,
तरी कुठे कमी पडतो सांगा गणाधीश! सांगा गणाधीश... 

- मंदार