पत्नी - तुम्ही सारखे का तिला पाहता हो?
मला चाहता की तिला चाहता हो?
पती - प्रिये तूच माझी खरी एक राणी
तिचा मी नसे, तीच माझी दिवाणी
पत्नी - तिला लाज नाही, तुम्ही लाज ठेवा
मिळे मुफ्त ऐसा बरा नाहि मेवा
पती - नसे मुफ्त ती, दागिना घेतला मी
स्वतःच्याच हस्ते तिला घातला मी
पत्नी - सुधारा, जरा लाज ठेवा मनाची
तुम्हा घालते आण माझ्या गळ्याची
पती - गळ्यातील हे आज तू घातलेले
मला भासते मी तिला आणलेले
पत्नी - तुम्ही घालवावेत नी आणते मी
तुम्हाहून रीती बऱ्या जाणते मी
पती - अरे बापरे, ती तुला भेटली का?
अरे इज्जतीची चिता पेटली का?
पत्नी - पती भेटतो त्या बयेचा मलाही
म्हणे घालतो दागिना मी तुलाही
