नसांतून साऱ्या आता संचार पोकळीचा

समाजा, तुलाही आता आधार पोकळीचा

उमाळा तराळांचा त्या ओझ्यावरून मोजा

कुणी मांडला हा जोखा बाजार पोकळीचा

किती ओढ आत्मीयांना, मी राहिलो न माझा

नको स्पर्श कोणा माझ्या नादार पोकळीचा

पराभूत झालो केव्हा, मी जिंकलो कितीदा

न दैवा चुके त्या अंती, शेजार पोकळीचा

तसे देव सप्ताहाचे नेमून सर्व झाले

नवी नोंद व्हावी आता, ना वार पोकळीचा

नको धूर संघर्षाचा, कोणी न दाद देई

पहा जाळ अंधारीही, झुंजार पोकळीचा