किती चाटणार भारतपुत्रा? : नागपुरी तडका
कृष्णावाणी राहुल आणि, म्हणे सोनिया भारतमाय
किती चाटणे आणखी रे, भारतपुत्रा असेच पाय? ...!!
जन्म गेला पूर्वजांचा, करता करता खुशामतगिरी
तेही नाचलेच होते, चप्पल घेऊन डोक्यावरी
आनुवंशिकतेचे जनुकं, काही केल्या मरत नाही
उलटून गेल्या पिढ्या तरी, लाळघोटणे सरत नाही
लोकशाहीचे गुणधर्म रक्तात काही मिसळत नाय ...!!
राजेशाहीची भलावण, रक्तामासात भिनलेली
भाटगिरीच करता करता, बुद्धी सारी झिंगलेली
कणा आणि मणकाही, उत्क्रांतीमध्ये गळून गेला
स्वाभिमान नावाचा इसम, शरमेसंगे पळून गेला
चापलुशीम्होरं आता, कसले संस्कार, कसलं काय ...!!
शंभर कोटी जनतेमध्ये, राष्ट्रनायक दिसत नाही
’ते’ घराणे सोडून अन्य, कुणीच लायक दिसत नाही
असेच आमचे गणराज्य, अशीच आमची लोकशाही
भगत-बापुंना का ज्ञात होते, अर्थ निघेल असाही?
मुजोर सारे अभय झाले, खाण्याकरिता मलईसाय ...!!
गंगाधर मुटे
......*.......*......*......*......*......*.......
इसम = व्यक्ती