वर्ष कसे गेले कळलेच नाही
कसे दिवस जातात पटकन हरवून
किती वर्ष गेली हे तरी कोठे समजले कधी ..??
जल्लोषात नवीन वर्षाचे स्वागत केले
जुने वर्ष संपताना ते बिचारे हताश होऊन गेले
फटाके कुणासाठी वाजले हे त्याला कळले देखील नाही
हिरमुसले रुसले हलकेच निघून गेले
काय दिले त्याने ?
काय घेतले आम्ही ??
काय घेतले ठाऊक नाही
काय हिरावून नेले हे फक्त लक्षात राहिले
जिवाभावाचा भाऊ गेला
आठवण आली की ,
काळीज फुटून जाते
जगणे फक्त ढकलून दिले जाते
काळोखाच्या समुद्रात विरघळून जावेसे वाटते
शप्पत ... ..शप्पत ..!!
एक अश्वत्थामाची भळभळनारी जखम झाली आहे
खोल हृदयात
वर्ष संपता संपतां
डोळ्यातून एक थेंब टपकला ….!!
एक ओरखडा माझ्या काळजात उमटला
सरल्या वर्षाचा एक चरचरता डाग तेवढा मागे राहिला
तुम्ही स्वागत करा नवीन वर्षाचे
मी पण करतोय ........
पण काळ ओरबाडून गेला माझ्या थेंबभर सुखाला
प्रचंड कल्लोळ
आत खोल गाभार्यात
त्याचे काय करू ...????