मी मोडल्या घराचे वासे विकून आले;

माझ्या तुझ्या सुरांचे गाणे विकून आले.

का शाप भोगले मी  वेड्या तुझ्या सुडाचे;

प्रश्नास छेडता  या  काही कळू न आले.

गावात आज माझ्या गर्दी भयाण झाली;

तू मांडला  तमाशा बघण्या वळून आले.

नात्यास भेग पडली तुकडे हजार झाले;

कोलाज रेखण्या मी गोळा करून आले.

या झोपड्यास माझ्या छळते गिधाड जेव्हा;

आकाश झाकणारे घरटे विणून आले.

गाडून आपले नाते सात पावलांचे;

मम पाखरास जपण्या आई बनून आले.