बदामाच्या पावडरीमध्ये दूध घालून मिक्सर ग्राइंडरवर बारीक करून घ्या. नंतर मध्यम आचेवर कढई तापत ठेवा. ती पुरेशी तापली की त्यात साजूक तूप, बदाम पावडर, साखर, व दूध घालून कालथ्याने ढवळत राहा. काही वेळाने हे मिश्रण पातळ होईल. अजूनही ढवळत राहा. थोड्यावेळाने मिश्रण घट्ट व्हायला लागेल व त्याचा गोळा बनला की ते एका ताटलीत काढून एकसारखे पसरून घ्या व वड्या पाडा.

बदामाची पावडर - २ वाट्या बदाम गरम पाण्यात १ तास भिजवा. नंतर त्यातले पाणी काढून टाका व सर्व बदाम सोला. सोलायला १ तास लागतो. हे खूप किचकट काम आहे. नंतर सोललेल्या बदामाची मिक्सर/ग्राइंडर वर बारीक पावडर करा. ही पावडर रवाळ होते. एकदा का ही मेहनत घेतली की मग त्यात बदामाच्या वड्या, बदामाची खीर व बदामाचा शिरा सर्व काही होते.

सौ सायली जोशी हिने सांगितलेल्या काजूकतली पद्धतीनुसार या वड्या बनवल्या आहेत. तिने ही सांगितलेली पद्धत खूप सोपी आणि छान आहे. प्रमाण एकदम बरोबर आहे. सायली जोशी अनेक धन्यवाद! याच पद्धतीने अक्रोड काजू, बदाम काजू, अक्रोड या वड्याही छान होतात. बाकीच्या वड्या इथे लिहिल्या आहेत. त्या वडी, मेवामिठाई या लेबलमध्ये आहेत.

ही पाककृती लिहिताना याचा प्रमुख घटक बदाम आहे तो मला यादीत सापडला नाही म्हणून काजू निवडला आहे.