माझ्या आजोबांनी लिहिलेले हे कठोपनिषदाचे रूपांतराचे १९५०साली प्रकाशित झालेले पुस्तकावरून हे उतरत आहे व त्यासाठी मी आजोबांनी ज्या नावाने लिहिले होते तेच नाव महाराष्ट्रीय घेऊन लिहिले आहे
दृढनिश्चय हा नचिकेत्याचा पाहुनी यमराजाला /
तोष वाटला. उपदेशाया मग तो प्रवृत्त झाला //१//
'अक्षय असे सुख मोक्षाचे त्यातें श्रेय म्हणावे /
अशाश्वतातें प्रेय बोलती दोन जाण ही नांवे //२//
श्रेय निराळे प्रेय निराळे असती निराळी परी दोनी /
साकल्ये तुज कळावयाला कथितों स्पष्ट वदोनी //३//
तत्प्राप्तीचीं तेवी साधने असती निराळी परी ती /
दोनी युनी मनुजापाशीं विनंती तयातें करिती //४//
स्वीकारी जो श्रेय त्यात जो जोडी कल्याणासी /
प्रेयातें घे उचलुनी तो नीज पुरुषार्थातें नाशी //५//
दोनी येउनी मनुजापाशीं म्हणती स्वीकार करी /
तुला हवे सुख तरी घे त्याची सत्ता माझ्याच करी //६//
विवेक त्यांचा न कळे वदतां येउनी यापरी जवळी /
ऐहिक योगक्षेमा भुलुनी प्रेया मंदची कवळी //७//
इहलोकीचे स्वर्गींचें वा सुख ते अनित्य कळुनी /
धीर पुरुष तो घे श्रेयातें पाहे प्रेय न वळुनी /८//
प्रियकर मोहक कामही बघुनी कळले तुज नीज हित रे! /
धैर्ये केला त्याग तयांचा, झालासी नमोहित रे //९//
प्रेयाचा त्या मार्ग हिरण्मय भुलुनी सारे जगती /
आश्रय त्याचाकरोनी जाती न कुणी अंती जगती //१०//
प्रेयाचा करी बोध अविद्या; विद्या ति श्रेयाचा /
दूर दूर त्या असती अगदी मार्गही भिन्न तयांचा //११//
विविध काम हे बघुनी राहिले निजहित भान /
खरी खरी रे दिसे लागली तुज विद्येची तान //१२//
किती मौज तुज सांगू बाळा! जन सारे या लोकी /
अविद्यातमीं रांगत फिरती त्यांची स्थिती अवलोकी //१३//
खरे ज्ञान मज म्हणती लाभले अज्ञानी मी नाही /
वाटे त्यातें स्वतां मागुनी यावे इतर जनांहीं //१४//
अंध निघावा पंथी अंधांची काठी धरोन हाती /
एका मागुनी एक मूढ हे तैसे भ्रमत राहती //१५//
परलोक तसे तत्प्राप्तीचें दुसरे साधन काही /
न कळे मुढां मोहित झाले स्त्रीसुतधनादिकांहीं //१६//
इहलोक तयां केवळ ठावा परलोका न पाहती /
पुनः पुन्हा ते जन्मा येउनी येती माझे हाती //१७//
जन्म मृत्यूची सर्वां मागे यापरी परंपरा ही /
त्या आत्म्याचे ज्ञान होय तो अखंड चालू राही //१८//
ज्ञानाचा तो दुर्लभ बाळा! वक्ता श्रोताही तसा /
कुशल गुरुचे पासुनी ज्यातें बोध लाभला हितसा //१९//
श्रुतिगोचर हि यास्तव नोहे बहुतां, कोणा परी ते /
श्रवणाचाही लाभ होउनी बोध न हृदयी करितें //२०//
स्वरूप त्याचे विविध सांगती स्वमतानुसार सारे /
सामान्य जनें, म्हणुनी, सांगता व्हावा बोध कसा रे? //२१//
अणूहूनही सूक्ष्म असे तो त्यातें प्रमाण नाही /
अद्वय भावही कथितां न कळे स्वरूप अनुमानां ही //२२//
न चले तेथे गती तर्काची लाभे ज्ञान न तेणें /
ज्ञानासाठी आचार्यांचा लागे आश्रय घेणे //२३//
तू तो बाळा! सत्यधृती खरा वाटे त्वन्मती बघुनी /
उदंड जन मज बोलायला तुजसम लाभोत गुणी //२४//
कर्मफले ती अनित्य आता कळते तत्त्व मला हो /
द्रव्ये अनित्य वेंचुनी नोहे नित्यवस्तुचा लाहो //२५//
त्या द्रव्यांहीं अग्नी उपासुनी आलो राजपदाला/
नित्यपदाचा लाभ परी तो ज्ञानेंची मला झाला //२६//
त्याच पदाचा आश्रय करुनी साऱ्या सृष्टी राहती /
सर्वकाम ते समाप्त होती येतां ते पद हाती //२७//
काम न उरतां, नोहे त्यातें कधी खिन्नता ठावी /
बळी त्रिभुवनी न दिसे कोणी जो त्या बळे दटावी //२८//
वर्णू जातां महत्त्व त्याचे माझी वाचा थकली /
वाग्देवताही साकल्ये जे वर्णन करू शकली //२९//
असे तयाची सत्ता बाळा! त्रिभुवनी साऱ्या भरली /
जावे तिकडे तेच आढळे गतीची सीमा सरली //३०//
अनुष्टितां क्रतुफलें अनंतची होती प्राप्त तयाला /
चिरकालें परी भोगुनी लागे पुनरपी परतायला //३१//
पद ते शाश्वत परितें लाभे ज्ञानिजनांला मात्र /
सुकृतें क्रत्वादिक नच करिती तेथ कुणाला पात्र //३२//
विवेक करुनी यापरी त्यजिले तुवां रोगसे भोग /
धन्य! धन्य! तू मीही धन्य! की तुजशीं माझा योग //३३//
देव पुरातन गुरू असे तो साधारण यत्नांहीं /
क्लेश साहिल्याविणें तयाचें दर्शन होणे नाही //३४//
आत्मज्ञाने प्रज्ञा होता स्थिर तो तयास पाहे /
हर्ष शोक मग संसारींचा नच तो कदापि वाहे //३५//
आत्मज्ञान श्रवण करोनी ते नीज हृदयामाजीं /
नित्य चिंतितां ठसोनिजाई सत्य वैखरी माझी //३६//
धर्मपरायण जीवात्मा तो त्यजितां नीज देहातें /
आनंदाने परमात्म्याला कवळी अपुलें हातें //३७//
मिळोनी जाई त्यातें जो की आनंदाचाच घडा /
तुज पुढतीही दिसतो बाळा! तोच जाहला उघडा ' //३८//
ऐकोनी या परी हांसुनी बोले मग तो बाळ यमातें /
'प्रसन्न झालां मजवरती तरी द्यावा हा वर मातें //३९//
कृताकृताहुनी धर्माधर्माहुनी वाजे की अन्य /
काले बाधित न जे तत्त्व ते कथुनी करा मज धन्य ' //४०//
निश्चय पाहुनी नचिकेत्याचा यम आनंदे डोले /
पूर्णं कराया इच्छा त्याची संबोधुनियां बोले //४१//
'श्रुती त्या साऱ्या तन्मय होउनी ज्याचे एकमताने /
कृपा जयाची संपादाया गात राहती गाणे //४२//
यत्पाप्तिस्तव मुनिवर मोठे विपिनीं तपत राहती /
ब्रह्मचर्य ते अखंड सेवुनी ज्याची वाट पाहती //४३//
देव कुठे तो तुला सांगतो त्याची उपासनाही /
प्रतिकाविणें तत्प्राप्तीचा सुगम मार्ग तो नाही //४४//
ब्रह्म म्हणती ज्या अनुशासितसे तेच सर्व हि सृष्टी /
उपासना करी ओंकारी तू ठेउनी अपुली दृष्टी //४५//
अक्षर म्हणती ब्रह्म कुणी हे ब्रह्म वा कुणी पर ते /
तया जाणतां उपासकाचे भावनेसी अनुसरते //४६//
ब्रम्हप्राप्तिस आलंबन हे श्रेष्ठ असे बुध म्हणती /
तयां जाणतां ब्रह्मलोकी जन त्यातें करिती प्रणती //४७//
पाहो जातां, आत्म्याला या नाही मृत्यू जरा वा /
कोणापासुनी किमर्थ तेणें अपुलाजन्म धरावा? //४८//
पूर्वी होता चिरकाल पुढे तैसा असावयाचा /
जाती येती देह किती तरी नाश न होय तयाचा //४९//
देह हाच तो आत्मा समजुनी करिती तयाचा घात /
आत्मा मेला म्हणती होता देहाचा त्या पात //५०//
बोलती या परी अज्ञानाने न कळे तत्त्व कुणाही/
न करी कोणी वध आत्म्याचा त्यातें नाशची नाही //५१//
पदार्थ सारा तयें व्यापिला नाही तो ठाव रिता /
सान थोर हा विवेक बाळा! त्यातें नाही वारितां //५२/
मोठा मोठा पदार्थ तेणें दिसे त्यापुढे पोर /
अणुरेणुंतुनी भरला म्हणुनी आणूही त्याहुनी थोर //५३//
जीवजंतू हे, त्यांचे हृदयी निवास करुनी राहे /
न परी कोणी त्यातें अपुल्या चर्मचचक्षुनी पाहे //५४//
काम जयाचा लया जाउनी प्रसन्न झाली करणे /
तेणेंच जगी आत्मदर्शनी आशा अंतरी करणे //५५//
हर्ष शोक ते न कधी येती स्पर्शी करावयास ।
आत्म्याचा जो महिमा त्याचा अनुभव येत तयास //५६//
बसल्या जागी बसोन तेणें दूरही निघोनी जावे/
स्वयें फिरावे सर्वत्र तसे इकडे स्वस्थ निजावे //५७//
हर्षित भासे, हर्ष रहितही, लागे शोध न सारा /
आश्चर्य पाहा! तयें व्यापिला अंगे सर्व पसारा //५८//
आत्म्याचे ते माझ्यावांचुनी स्वरूप कोणा ठावे?
अधिकाराविण कळले तरी ते हृदया केंवी पटावे? //५९//
दृश्य पसारा अस्थिर सारा त्यांत राहतो स्थिर तो /
येती जाती किती शरीरे तयासवें नच फिरतो //६०//
आत्मा व्यापुनी सर्वही राहे स्थिर चर कसे असो की /
आत्म्याचे हे स्वरूप जाणुनी पंडित न पडे शोकीं //६१//
तज्ज्ञानाचा लाभ कुणाला नोहे व्याख्यानांहीं /
बुद्धिमंत जन बुद्धी तयांची येथे कामा नाही //६२//
पढे श्रुती स्मृती आध्यात्मिक वा ग्रंथभार सारा ही /
वृथा वृथा श्रम ज्ञानामृत ते सारे दूरची राही //६३//
आत्मदर्शनीं आर्त जाहला साधक नर जो लोकी /
होतो आत्मा प्रसन्न त्यावरी तोच तया अवलोकी //६४//
आचरणी वा मनी न जोंवरी सुटली दुरिताचरणें /
आत्मदर्शनीं आशा न कुणी अंतरी तोंवरी करणे //६५//
आत्मदर्शनीं यत्न करी परी इंद्रियगण तो रमला /
चंचल भावे विषयी तरी तो व्यर्थची वाटे श्रमला //६६/
सिद्धीसाठी स्वमनाची जो एकतानता नाही/
न आत्मदर्शन घडे तोंवरी केवळ अध्ययनांहीं //६७//
एकाग्रमनें चिंतन करी परी अंतरी अभिलाष धरी /
संपादुनियां ज्ञानही न पडे अनुभव त्याचे पदरी //६८//
संक्षेपें तुज कथितों आधी प्रभाव त्या देवाचा /
साकल्ये तो वर्णायाला निर्बल माझी वाचा //६९//
ब्राम्हण जे की तपःप्रभावें रक्षिती सर्व जनांसी /
क्षात्रगण तसा स्वबलें जो की जनतेचे भय नाशी //७०//
बलिष्ठ यापरी त्या उभयांतें गिळितो अन्नापरी तो /
सकळांचाही काळ त्या सवे तोंडीलावणे करितो //७१//
सर्व वेळ हा खेळ तयाचा अद्भुत की त्यास कला /
कोठे केस देव असे तो न कुणी जाणो शकला //७२//