आयुष्य आहे तोकडे माझे
आहे जगाशी वाकडे माझे
मागायचे होते मला काही
वायाच गेले काकडे माझे
संसार माझा व्यर्थची गेला
हलकेच होते तागडे माझे
भेटो तिला तो देखणा कोणी
खोटेच आहे साकडे माझे
सौंदर्य आहे सांडले येथे
ना ध्यान गेले त्याकडे माझे
झाकू कशाला देह हा माझा
वृत्तांत सारे नागडे माझे
पापीच होते वागणे तेंव्हा
का काढता हो पोपडे माझे
जेंव्हा नको ते बोललो मीही
का शब्द झाले बोबडे माझे
