[फरहाद शहजाद यांची मेहदी हसन यांनी गायलेली 'तनहा तनहा मत सोचा कर' ही गझल ऐकताना सुचलेले मुक्तक - स्वैर भावानुवाद]
निर्जन एकांती असे रे, भलते विचार करू नको
जिवावर बेतेल मित्रा, असा अविचार करू नको
खूप झाले क्षणभरासाठी, लाभली मुग्ध प्रीती तुला रे
खोटी खरी याची आता, शहानिशा तू करू नको
डसणे जिचा 'धर्म' आहे, डंख ती मारून गेली
साहणे हे तुझेच प्राक्तन, भोगताना विव्हळू नको
एकाकी पाडते तुला ना, भरमध्यान्ही सावली
वर्म आकळले तुला रे, उगाच आता झुरू नको
हरलास जरी बाजी जराशी, सर्वस्व पणाला लावूनी
कैफात धुंद तू रहा जुगार्या, रूक्ष हिशेबी गुंतू नको
जळो वांझ पश्चातबुद्धी, ऐक माझे 'हरिभक्ता' तू
डाव नव्याने मांड आता, उगाच ते तू टाळू नको
(पुन:प्रकाशित. मूळ दुवाः दुवा क्र. १)