डोळ्यांची भाषा आता डोळ्यांना कळते आहे

हृदयिचे गाणे अपुल्या ओठावर फुलते आहे.

स्वप्नातच सरतो दिस अन् स्वप्नातच कटती राती

स्वप्नाच्या झोक्यावरती मन माझे झुलते आहे.

तुजलाही कळले सारे मजलाही कळते आहे

पण भाव मनीचे न कुणी ओठांनी वदते आहे.

हा रोग असा जडता जीवाला ना सुचते काही

भान हरपते आणि कुठे मन वणवण फिरते आहे.

ही जी वाट घराच्या पाशी बघ आहे जात तुझ्या

पाऊल माझे का हे आता तिकडे वळते आहे.