गझल
वृत्त:राधा
लगावली: गालगागा/गालगागा/गालगागा/गा
*********************************
हाय आले जीवनाचे भान मरताना!
श्वास घेण्याचेच केले काम जगताना!!
काय केले, काय नाही, पाहिले नाही;
आंधळे आयुष्य जगलो अंध नसताना!
राख होताना कुणीही बोलले नाही;
का दिशा करतात चर्चा आग विझताना?
ना विनासायास आली ही अनासक्ती;
आतड्यांना पीळ पडले पाश तुटताना!
लाख डवरू दे फुलांनी झाड बहरू दे;
वेदना होतेच त्याला पान गळताना!
घोट एकाकीपणाचे प्यायला शिकलो;
पाहिले परसात जेव्हा झाड वठताना!
हा प्रपंचाचा पसारा चार दिवसांचा!
रोज ही जाणीव होते सूर्य बुडताना!!
वंचना याहून मोठी कोणती असते?
पारखे आकाश व्हावे पंख असताना!
-------प्रा.सतीश देवपूरकर
भूशास्त्र व खानिज तेल तंत्रज्ञान विभाग,
नौरोसजी वाडिया महाविद्यालय, पुणे.
फोन नंबर: ९८२२७८४९६१