गझल
वृत्त: आनंदकंद
लगावली: गागालगा/लगागा/गागालगा/लगागा
*************************************************************

मी मोहरेन ज्याने तो हा वसंत नाही!
कुठल्याच कोकिळेचे गाणे जिवंत नाही!!

फिरवून तोंड गेला मधुमास ऎनवेळी;
माझ्या प्रतारणेला कुठलाच अंत नाही!

मी सुरकुतू दिले ना केव्हाच चेहऱ्याला;
आरास वेदनांची मजला पसंत नाही!

विसरून लोक गेले, कोणास खंत नाही;
आता रडायलाही कोणी जिवंत नाही!

मी घोळक्यात होतो, अन् एकटाच होतो....
माझ्या मनास कोणी पडले पसंत नाही!

प्रत्येक माणसाच्या हातून चूक होते;
कोणीच संत नाही, कोणी महंत नाही!

झाली बरीच वर्षे निष्पर्ण जाहल्याला;
माझ्या स्मृतींमधेही आता वसंत नाही!

हसलो न मी सुखांनी, रडलो न वेदनांनी;
इतकी मला मिळाली केव्हा उसंत नाही!

-------प्रा.सतीश देवपूरकर
भूशास्त्र व खानिज तेल तंत्रज्ञान विभाग,
नौरोसजी वाडिया महाविद्यालय, पुणे.
फोन नंबर: ९८२२७८४९६१