सहजीवन
कधी मी तुला पांघरले
कधी तू मला पांघरले
त्याच सोनेरी क्षणांनी
आयुष्य अवघे चितारले
कधी मी तुला फटकारले
कधी तू मला बोचकारले
बोचऱ्या त्या क्षणांनीच
सुखाला तीट काजळाचे लावले
कधी मी रुसलो
कधी तू अबोल झाली
चारच पळे ति दुराव्याची
युगा- युगांपरी भासली
कधी मी गहिवरलो
कधी डोळे तुझे पाझरले
ओल्या- ओल्या त्या क्षणांनीच
नदी- सागर एक झाले
भरती कधी ओहोटी
आपला आपणच किनारा
हात हाती गुंफूनी वल्हवू
सहजीवनाचा हा शिकारा......!!!
-उद्धव कराड, (मो. नं. ९८५०६८३०४५)
मु. जळगाव, ता. निफाड, जि. नाशिक.
